Sosialy

Asa fanaovan-gazety Nodimandry i Jacob Andriambelo

Sosialy
Alatsinainy 03 Febroary 2020

Nodimandry ny faran’ny herinandro lasa teo ny mpanao gazety zokiolona Jacob Andriambelo.

Teo amin’ny faha-79 taona izy izao lasa izao. Anisan’ireo andrarezin’ny asa fanaovan-gazety nanomboka tany amin’ny taona 60, ary nikoizana izy tamin’ny asa sorany fahavelony. Tia mandalina ny raharaham-pirenena, ka nanehoany hevitra ohatra ny raharaha famonoana ny Kolonely Ratsimandrava. Tena mampalahelo ny milaza azy, fa tsy ho fantatra mihitsy, ary tsy ho fantatra mihitsy ny olona namono azy… Anisan’ny tsy tia azy ny Frantsay”, hoy izy ny 12 febroary 2018. Nitana andraikitra maro tamin’ny tontolon’ny asa fanaovan-gazety satria efa tompon’andraikitra tao amin’ny gazety « Le Courrier de Madagascar », « Journal de Madagascar », « Madagascar Matin »,… Efa nitondra sy nizara ny traikefany sy ny fahaiza-manaony tato amin’ny gazety Tia Tanindrazana ihany koa ity andrarezin’ny asa fanaovan-gazety ity, izay tena tia nizara sy nampianatra ity. Isika eto amin’ny Gazety Tia Tanindrazana dia miray fo sy miombona alahelo, ary mirary fiononana feno ho an’ny fianakavian’i Jacob Andriambelo manontolo.

Toky R