Sosialy

Aretina mamany lava Vehivavy maherin’ny 50 no hiatrika fandidiana

Sosialy
Alakamisy 08 Aogositra 2019

Natomboka tamin’ny alatsinainy lasa teo ny hetsika hitsaboana ny aretina “mamany lava” any Ambovombe Androy ary hitohy mandritra ity volana aogositra ity.

Vehivavy maherin’ny 50 isa avy amin’ireo faritra 3 any amin’ny tapany atsimon’ny Nosy no efa tonga tao an-tampon-tanànan’Ambovombe, mba hodidiana. Raha tsiahivina, ny aretina “mamany lava” dia mahatonga ny fivalanan-drano hikoriana ho azy. Azo avy amin’ny fahasarotam-pahaterahana izy io, saingy azo tsaboina tsara amin’ny alalan’ny fandidiana. Nanangana toerana handraisana an’ireo vehivavy ireo, any an-toerana, ny Tahirin’ny Fikambanana momba ny Mponina (UNFPA) ary mbola manantena fa hisy vehivavy hafa ho tonga hanatevin-daharana an’ireto vehivavy efa tonga any ireto. Raha araka ny tombana tokoa mantsy dia ahitana trangana “mamany lava” vaovao miisa 5.000 isan-taona eto amintsika. 1.000 isan-taona eo ho eo ihany anefa no vitan’ny hopitaly eto amintsika ny mandidy azy. Tafiditra ao anatin’ilay tetikasa antsoina hoe “tolisabo”, izay natomboka tamin’ny 18 jolay lasa teo ity hetsika fandidiana ny aretina mamany lava ity, iarahana amin’ny minisiteran’ny fahasalamam-bahoaka, ny UNFPA ary ny masoivohon’i Japana.

Marigny A.