Sosialy

Antsiranana Ifampitadiavana ny rano fisotro madio

Sosialy
Alarobia 18 Martsa 2020

Misedra olana amin’ny famatsiana rano fisotro madio ny mponin’Antsiranana nanomboka afak’omaly.

Noho ny haratsian’ny toetrandro nateraky ny ora-mikija no nahatonga izany. Nisy vokatr’izany ny fantsona lehibe roa lasan’ny rano ary nisy ihany koa ireo nilatsahan’ny vato ka simba ary mitaky fanamboarana.Noho ny fitohizan’ny ora-mikija anefa dia mbola tsy afaka miroso amin’ny asa fanamboarana ireo teknisiana. Eo am-piandrasana izany dia nandray fepetra maro ny mpitantana ny orinasa JIRAMA, tohanan’ny orinasa Star. Ny mponina akaikin’ny tobim-panadiovan-dranon’ny JIRAMA PK7 dia afaka maka rano mivantana eo amin’io toby io.Ireo mponina any amin’ny fokontany lavitry ny PK 7 kosa dia hozaraina rano amin’ny alalan’ny "camions citerne". Nanomboka omaly no nanaovana izany asa fanampiana ho an’ny isan-tokantrano izany nanomboka tamin’ny 05 ora hariva. Hifandimby maraina sy hariva moa izany ho an’ny Fokontany maro any an-toerana miankina amin’ny fandaminana. Miala tsiny amin’ny mponina noho izany ny JIRAMA noho ny fanelingelenana.