Sosialy

Partagé sur :
• facebook

Sesilany ny hain-trano ao Antsirabe renivohitra ao. Vao tapa-bolana lasa izay dia nitrangana hain-trano goavana tao Mahazoarivo Avaratra ka nahamaizana tranobe iray nisy fianakaviana valo tonta.

Ny alin’ny sabotsy hifoha alahady 26 aogositra 2018 dia nitrangana hain-trano indray koa tao amin’ny fokontany Mahazoarivo avaratra ihany ka tranohazo nisy tokantrano 5 indray no may ny maraina tokony ho tany amin’ny 1 ora sy sasany tany ho any, izay mpivarotra kafe sy mofo ary mpivarotra saribao sy mpanao lasopy ireny no tra-doza tamin’izany. Olona manodidina ny 40 no traboina sy tsy manan-kialofana. Kisoa niisa 5 no main’ny afo ary tsy nisy noraisina ny tao an-trano na iray aza. Nambaran’Atoa Razafinarivo Remi, anisan’ireo niharam-boina fa avy tany ivelan’ny trano no niandohan’ny afo, izay notombanan’izy ireo fa nataon’olona avy any ivelany ka sahirana avokoa ny tao an-trano vao tafavoaka ny trano. Nanamarina izany moa ny tovolahy iray natory tao anaty fiara, izay nahita ny afo nidedaka be avy taty ivelany vao taitra nanaitra ny tao anatin’ny trano ary nanakisaka ny fiara haingana.  Tokony ho tamin’ny 4 ora sy sasany maraina moa vao tonga ny mpamonjy voina an’ny orinasa Cotona ka norarafan’ny olona tsy fantatra ny tora-bato, izay nahatezitra ny mpitandro ny filaminana. Marihina moa fa olana eto Antsirabe ny tsy fisian’ny fiara mpamonjy voina, kanefa dia feno tranohazo eto Antsirabe. Misy ihany ireo fitaovana famonjena voina an’ny BNGRC ao amin’ny toeram-ponenan’ny Prefen’Antsirabe saingy mbola alaina rony sy tsy miasa izany hatramin’izao fa angamba mbola hiandrasana amin’ny fampielezan-kevitra ve ?

Caius R

Tia Tanindrazana

Samia mijoro ho an'i Gasikara.