Sosialy

Antananarivo Renivohitra Tsy ekena intsony ny mivarotra eny amin’ny arabe

Sosialy
Talata 05 Febroary 2019

Taorian’ny fihaonana teo amin’ny Kaominina Antananarivo Renivohitra sy ny prefektiora ary ny polisy nasionaly manerana ny boriborintany enina amin’ny famahana ny olan’ny fifamoivoizana eto

an-drenivohitra sy ny manodidina dia nidina ifotony teny amin’ny amin’ny pavillon Analakely ny sekretera jeneralin’ny kaominina Atoa Heriniaina Razafimahefa sy ny lefiny omaly . Tao anatin’izany no nanazavan’izy ireo tamin’ireo mpivarotra fa tsy maintsy hajaina ny lalàna efa nisy hatramin’izay. Ny arabe dia natao ho an’ny fiarakodia ka tsy azo hivarotana intsony. Ny trottoir ihany koa dia natokana ho an’ny mpandeha an-tongotra ka tsy azo ivarotana ihany koa. Nankasitraka ireo mpivarotra amoron-dalana nihaona tamin’ny tompon’andraikitry ny kaominina, omaly. Nomarihin’ny sekretera jeneralin’ny kaominina Atoa Heriniaina Razafimahefa fa tsy maintsy natao izany hitsinjovana ny rehetra sy ho fanajana ny lalàna misy. Tsy maintsy manaraka ny hitsy na “alignement” araka ny lalàna napetraky ny kaominina ny mpivarotra rehetra manomboka izao fa tsy mahazo mibahana ny arabe intsony. Marihina fa efa azon’ny fiara ivezivezena tsara eny amin’ny pavillon Analakely amin’izao raha tsy azo nandinganana mihitsy teo aloha.