Sosialy

Antananarivo Renivohitra Hampitomboina ny faritra maitso

Sosialy
Alatsinainy 03 Febroary 2020

Ao anatin'ny ezaka fanatsarana endrika ny tanànan'Antananarivo dia notanterahina ny sabotsy lasa teo ny fanombohana ny taom-pambolen-kazo ho an'ny kaominina Antananarivo Renivohitra (CUA)

izay notarihin'ny Ben'ny tanàna Naina Andriantsitohaina mivady, ny Filoham-pirenena Andry Rajoelina mivady. Nanamafy moa ny filoha Andry Rajoelina fa 40 000ha isan-taona ny faritra hovolena hazo manerana an'i Madagasikara. Efa tetikasan'ny fitondram-panjakana ihany koa, hoy izy ny hambolena hazo iray farafahakeliny isan-tokantrano, ary koa zaridiana iray isaky ny fokontany. Ankoatra ny fanatsarana ny endriky ny tanàna dia tsy maintsy fenoina zava-maitso sy zaridaina ihany koa ny tanànan'Antananarivo, hoy ihany izy. Teo amin'ny lalam-baovao eny Tsarasaotra no nanamarihina izany ka nandray anjara tamin'izany niaraka tamin'ireo mpiasan'ny fiadidiana ny tanànan'Antananarivo miisa 1000 mahery. Hazo maherin'ny 1440 no novolena manemitra ny lalana miainga avy eo Tsarasaotra ka hatrany amin'ny seranam-piaramanidina Ivato. Omaly hariva, dia nisy ny dia nataon’ny filoha mivady sy ny ben’ny tanàna mivady nidina tamin’ny tohatohabaton’Ambondrona. Nitafa tamin’ny mpivarotra vitsivitsy, ary nanohy ny dia niakatra an’Antaninarenina indray avy eo.

Marigny A.