Sosialy

Anosy manamorona ny RNM Efa tena lasa tsenabe

Sosialy
Alarobia 04 Martsa 2020

Efa tena lasa tsenabe ny eo Anosy manamorona ny fefin’ny Radio nasionaly Malagasy amin’izao.

Mila ho tonga hatreny amin’ny Fitsarana mihitsy manomboka andro talata ka hatramin’ny zoma raha somary mangingina ny alatsinainy. Ny alakamisy moa dia tsy lazaina intsony, noho ny hamaroan’ireo mpivarotra sy mpiantsena. Handamina ny mpivarotra amoron-dalana sy hampiditra azy ireo anaty tsena anefa no re tamin’ny fampielezan-levitry ny ben’ny tanana Naina Andriantsitohaina. Ankehitriny, ny fitomboan'ny mpivarotra amoron-dalana no hita ary toerana tsy mbola nisy azy ireo mihitsy teo aloha. Manome endrika ratsy ny renivohitra sady mandoto tanàna izao hamaroan’ny mpivarotra amoron-dalana etsy sy eroa izao. Hita ho sahirana ny kaominina Antananarivo Renivohitra na dia efa tena miezaka mikaro-bahaolana aza sady efa tsara tohana avy amin’ny fitondrana foibe. Toa mitovy tamin'ny mpitantana ny kaominina teo aloha ihany ny zava-misy amin'izao fotoana hatreto. Asa izay mety ho fivoarana any aoriana any fa dia hiarahantsika mitazana eto.