Sosialy

Anosinalainolona-Marovoay 320 ha no ho afaka volena in-droa isan-taona

Sosialy
Talata 18 Aogositra 2020

Lakandrano mirefy 3 km sy 14 m ao amin’ny Kaominina Anosinalainolona, Disitrikan’i Marovoay no diovina sy halalahina. Nanomboka ny sabotsy 15 Aogositra ny asa.

Tsentsin’ny fasika tanteraka mantsy ity lakandrano ity, efa amam-polo taonany, taorian’ny fikatonan’ny orinasa FIFABE. Velaran-tanimbary maherin’ny 320 ha eo no voatondraka rano aorian’izao asa izao ary ho afaka hamboly in-droa isan-taona ny tantsaha raha toa ka ny asara ihany izy ireo no afaka namboly vary teo aloha ary zara raha mahazo vary akotry efatra gony amin’ny tanimbary antsasaka hekitara noho ny tsy fisan’ny rano. Manantena hahavoka-bary hatrany amin’ny 3 taonina isaky ny hekitara izy ireo rehefa vita ity lakandrano ity. Ny fiara vaventy avy amin’ny BNGRC no anaovana ny asa fanadiovana ny lakandrano. Tsipaipaika teo amin’ireo mpahazo tombotsoa ao Anosinalainolona kosa ny solika sy kojakoja nampandehanana azy. Ankoatra ireo dia nanome solika 200 litatra ihany koa ny Solombavambahoaka voafidy tao Marovoay.

Jean D.