Sosialy

Anosibe-Antananarivo Manjaka ny havoretrana sy tsy fifanajana

Sosialy
Alakamisy 13 Jona 2019

Samy manao izay saim-pantany, ary toy ny tany tsy misy lalàna amina toerana maro eto an-drenivohitra, tahaka ny etsy Anosibe.

Fifamoivoizana mikorontana, sarety mibahana sy manelingelina, tatatra lasa fanariana poti-kanina sy rano maloto, indrindra fa ny fako. Tsy tahotra tsy henatra ny fanaovana maloto an-dalambe. Olombelona no misokitra sy manadio ireny fako sy maloto ireny fa tsy sanatria biby. Tsy tonga saina anefa ireo olona efa zatra gaboraraka. Mba vita tsara ihany ny fotodrafitrasa satria fotaka mandrevo ny teny fahiny, saingy tsy misy fanajana ireo fananana iombonana ireny. Ny mpitondra hatrany no mahazo tsiny. Rehefa dinihina dia toa ny Malagasy mihitsy no sakana amin’ny fandrosoana. Mila fanabeazana sy fahatongavan-tsaina, saingy toa miandry andrasana tahaka ny omby vao hanara-dalàna sy hikolo sy hanaja ny tontolo manodidina. Ny fitaizana tsy ampy, ny olona zatra gaboraraka, mpitondra mety tsy ampy fandraisana andraikitra. Sanatriavina, toa ny biby indray no mahay miara-miaina sy mitsinjo kokoa ny manodidina azy. Mila fahatongavan-tsaina !

Toky R