Sosialy

Partagé sur :
• facebook

Notanterahina nanomboka omaly, haharitra hatramin’ny fiandohan’ny volana mey ho avy izao ny fanamarihana ny herinandro eran-tany ho an’ny hetsika fanabeazana ho antsika eto Madagasikara.

Anisan’ny mandray anjara feno amin’izany ny  « COalition NAtionale Malgache pour l’Education Pour Tous » na ny CONAMEPT,  tarihin’ny mpandrindra nasionaliny Rakotoarivony Huguette. Raha tsiahivina, efa tamin’ny taona 2003 no nanomboka nomarihina teto Madagasikara ny  herinandro eran-tany ho an’ny hetsika fanabeazana, niarahana tamin’ny “Global Campaign for éducation”. Noraisin’ny CONAMEPT ny fivoizana izany nanomboka ny taona 2014. Ny tanjon’ity fiarahamonim-pirenena ity dia ny hitadiavam-bahaolana mahakasika ireo ankizy sy tanora  tsy mbola afaka mianatra ara-dalàna eto amintsika sy ireo mpampianatra misedra olana. Lohahevitra noraisina tamin’ity ny hoe :  “Zoko feno ny mahazo fanabeazana”. Tsy izay anefa no tena zava-misy eto amintsika, hoy Rakotoarivony Huguette ka tsy afaka ny hipetra-potsiny izy ireo. Mbola betsaka ireo ankizy mivarotra harona plastika, ireo miasa an-trano… Anisan’ny hitadiavan’izy ireo  vahaolana ihany koa ny momba ireo mpampianatra kely karama nefa miasa mafy. Nasian’izy ireo resaka ihany koa ny fanatanterahana ny fanaovana ny drafi-pampianarana vaovao na ny PSE izay fantatra fa tsy ampy ny vola hampiasaina ary efa nankatoavina tamin’ny taona 2017 ny fampiharana azy.

Pati

Tia Tanindrazana

Samia mijoro ho an'i Gasikara.