Sosialy

Ankazotoho Anosizato Nitokona ireo mpitondra cyclo posy

Sosialy
Alarobia 04 Martsa 2020

Nitokona avokoa ireo mpitondra cyclo posy mampitohy an’Ankazotoho sy Anosizato omaly maraina.

Noho ny fisian’ireo bajaja maromaro izay an’olon-tsy fantatra tonga manao asa fitaterana eny an-toerana no antony, efa nanao fanandramana nandritra ny andro vitsivitsy ary tsy maka saran-dalana. Tokantrano marobe anefa no mety tsy hihinan-kanina intsony raha mbola manohy ny asany ireto bajaja ireto. Mahatratra 170 isa izy ireo ary raim-pianakaviana avokoa no mitondra azy, mamelom-bady aman-janaka. Ankoatra izay, raha araka ny fanazavan’ireo mponina eny an-toerana izay manohana akaiky ireto mpitondra cyclo posy ireto ihany koa dia nampihena ny asa fanendahana teny an-toerana ny fisian’izy ireo ankoatra ny famahana ny olan’ny fitaterana. Miasa manomboka amin’ny 3 ora sy sasany maraina izy ireo isan’andro ary amin’ny 8 ora sy sasany alina vao mirava, mijery sy miandriandry ireo mpiasa sy mpianatra sendra tratra alina. Miantso ny kaominina Anosizato Andrefana sy ireo tompon’andraikitra isan-tsokajiny ny mponin’Ankazotoho mba hijery akaiky ity tranga ity. Marihina moa fa nobahanan’ireo mpitondra cyclo posy ireo mpitondra bajaja omaly izay marihina fa tsy mahalala na inona na inona. Efa tany Soavina moa no fantatra fa voaroaka ireto bajaja ireto ary izao nitady lalana eny Ankazotoho Anosizato izao indray.

Pati