Sosialy

Ankazotoho Anosizato Nariana tao ambany sarety ilay zaza menavava

Sosialy
Alakamisy 14 Mey 2020

Zaza menavava iray tombanana ho herinandro latsaka an-tany eo ho eo no nisy nanary tao ambany sarety mijanona ary hitan’ny fokonolona afaka omaly Talata tokony ho tamin’ny 7 ora hariva.

Tao amin’ny Fokontany Ankazotoho, kaominina Anosizato Andrefana no nitrangan’izany. Olona roa no nisy nahatazana teo akaikin’io sarety io tamin’ny fotoana nitrangan’ny tantara saingy tsy nieritreritra zavatra hafa. Rehefa nahare feon-jaza nitomany ny sasany vao tonga saina ka nahita ilay tsy manan-tsiny izay mbola velona soa aman-tsara no sady voafono lamba ihany koa. Voatery notazonin’ny komitim-pokontany ity zaza ity tamin’io alina io raha omaly kosa no fantatra fa nentina nanatona ny mpitandro ny filaminana izy hahafantarana izay tokony hatao. Raha ny vinavinan’ireo nanatri-maso ny zava-nitranga moa dia olona nandalo tsy mipetraka ao amin’ity Fokontany ity no mety ho tompon’antoka tamin’izao fanariana zaza izao izay marihina fa lahikely. Na izany aza dia efa misokatra ny fanadihadiana mahakasika izany.

Pati