Sosialy

Ankazobe Mpianaka no indray matin’ny pesta

Sosialy
Alarobia 02 Oktobra 2019

Namono olona indray ny aretina pesta atoditariana tany Fiadanana Ankazobe.

Olona mianaka samy lehilahy avokoa, 40 sy 14 taona no indray namoy ny ainy tany an-toerana izay fantatra fa nielanelana herinandro monja. Ilay zaza no namoy ny ainy voalohany, hoy ny dokotera Manitra Rakotoarivony, talen’ny fampiroboroboana ny fahasalamana eo anivon’ny minisiteran’ny fahasalamam-bahoaka. Tsy fantatra izay nahazo azy fa namoy ny ainy izy ary dia nalevina izay toa tsy nisy taratasy nanazava ny aretiny avy amin’ny dokotera akory. Narary indray ilay rainy niteraka azy 40 taona taorian’izay. Rehefa nahatsiaro tsy fetezana diso tafahoatra izy dia nanatona ny CSB ao Fiadanana. Fantatra fa efa ela ity raim-pianakaviana ity no tratry ny aretina pesta ka efa nahazo vahana tao anatiny ilay aretina ary tsy nahatohitra izany intsony ny ainy. Maty ihany koa izy vokatr’izany. Ankoatra azy mianaka ireto dia tovolahy iray 20 taona izay nifanerasera be tamin’izy ireo ihany koa no fantatra fa voa saingy avotra soa aman-tsara ny ainy. Voatery nidina tany an-toerana nanao fanentanana sy nizara fanafody ho an’ireo fianakavian’ny maty ny minisitera ka olona miisa 11 hatreto no efa nahazo fanafody sy nozahana maimaimpoana ny fahasalamany. Miantso ny rehetra mba samy ho malina manoloana ny mety ho fisian’ny aretina, indrindra amin’izao fotoana manakaiky ny fiavian’ny ranon’orana izao.

Pati