Sosialy

Analakely sy ny manodidina Tsy maintsy miala ireo mpivarotra amoron-dalana

Sosialy
Talata 14 Janoary 2020

Nidina ifotony teny amin’ireo faritra misy mpivarotra amoron-dalana toy ny etsy Tsaralalana sy ny manodidina ireo polisy miasa ao amin’ny kaomisarian’ny boriborintany voalohany etsy Analakely omaly.

Nanentana ireo mpivarotra ny polisy ary mampiomana azy ireo mba hiala eo amin’ireo toerana ireo ary hanatona ny kaominina hahafantaran’izy ireo ny toerana tokony ho azony hivarotana. Izao no natao dia mba hanalefahana ny fitohanan’ny fifamoivoizana sy hahafahan’ny mpandeha an-tongotra mandeha eny amin’ny « trottoir » ary entina hanabeazana ny mpampiasa lalana ao anaty fanarahan-dalàna, hoy ny fanazavana. Taorian’ny fanentanana, dia hiroso hanala ireo mpivarotra izy ireo amin’ny herinandro manaraka io raha toa ka mbola mahita mpivarotra amoron-dalana eny amin’ny faritra Analakely sy ny manodidina. Nanahirana ny mpitantana ny tanàna ny fanalana ireo mpivarotra amoron-dàlana, ka ny hirariana mba tsy hananosarotra ny asa ataon’ny polisim-pirenena ho fanalalahana ny fifamoivoizana sy ho fampanajana ny lalàna.

Toky R