Sosialy

Ambositra Karohina fatratra ireo mpamatsy sy mpandray taolam-paty

Sosialy
Alarobia 15 Janoary 2020

Ao anatin’ny famotorana tanteraka ny mpitandro filaminana mahakasika ireo telo lahy tratra nitondra taolam-paty 5 sakôsy.

Voalaza fa karohina ireo mpiray tsikombakomba loharano sy mpanjifa ireto taolam-paty ireto. Taolam-paty lava miisa 188 nentin'ny jiolahy 3 no sarona tao Andalamahitsy Ambositra II, ny folakandron'ny alahady 12 janoary 2020. Rehefa nahazo angom-baovao avy amin'ny olona tsara sitrapo ny tobim-paritry ny Zandarimariam-pirenena Ambositra fa misy fiara mazda miloko mena sy fotsy avy any Fandriana mitondra taolam-paty, dia nanao sakana sy fitsirihana tao Andalamahitsy. Sarona tokoa ilay fiara ka rehefa nosavaina dia taolan-dava miisa 188 natao tao anaty sakôsy 5 no hita. Nosamborina avy hatrany ireo lehilahy miisa telo nitondra izany, izay samy avy any Fandriana sy niaiky fa mpisera taolam-paty ary nogiazana ambalam-pamonjana ilay fiara. Mitohy ny fanadihadiana lalina ahafantarana ny manodidina itony raharaha itony. Ankasitrahan’ny mpitandro filaminana ny loharanom-baovao sy ny hakingan'ireo Zandary nanao fitsirihana.

Haja Nirina