Sosialy

Ambohitrimanjaka Miverina amin’ny laoniny ny famatsian-drano

Sosialy
Zoma 04 Oktobra 2019

Efa miverina amin’ny laoniny ny fizarana rano eny Ambohitrimanjaka amin’izao,

hoy ny minisiteran’ny fambolena sy ny fiompiana ary ny jono. Miantoka ny fiveloman’ny tantsaha Malagasy ny famokarana eny ambanivohitra, indrindra ny famokaram-bary, hoy io minisitera io. Ezaka lehibe anisan’ny tratrarina ao rahateo ny fahavitan-tenan’ny Malagasy ara-bary ary saro-pady tokoa ny fampidirana rano an-tanimbary. Noho ny tsy fahampian-drano eo amin’ny lemak’Ambohitrimanjaka dia teraka ny disadisa teo amin’ireo samy mpamboly sy mpampiasa ny reniranon’i Sisaony. Nisy tantsaha nanangana toha-drano tsy ara-dalàna ka velaran-tanimbary manodidina ny 1 000 ha, izay mamokatra vary 6t/ha no lasa maina tanteraka ka tsy afaka nanohy ny asa famokarana ireo hafa ao an-toerana. Tsy azo atao anefa ny manao sakana. Manoloana izany dia nijery ny zava-misy ny minisitera. Efa voavaha ny olana ankehitriny ary efa miverina amin’ny laoniny ny fitantanan-drano eny an-toerana. Afaka 15 andro, raha ny fanazavana nentin’ireo tantsaha izay tratry ny fahirano teo aloha dia afaka hanomboka indray, hanohy ny asa famokarany izy ireo. Tsy miombon-kevitra amin’ny fanotofana tany kasain’ny fanjakana hatao ve ny minisiteran’ny fambolena sy ny fiompiana ary ny jono ?

Toky R