Sosialy

Ambohipo, Ankatso, Ambatomaro Tezitra noho ny krizin-drano ireo mpianatra

Sosialy
Alarobia 08 Desambra 2021

Raikitra indray ny grevin’ny mpianatra teny Ankatso sy ireo avy eny Ambatomaro omaly noho ny tsy fisiana sy tsy fahampian’ny rano eny amin’ny toeram-ponenan’ny mpianatra.

Ny alin’ny alatsinainy hifoha omaly talata no efa nihetsika nanakan-dàlana ny teny Ambohipo, ary dia io niitatra io indray. Nilaza ho leo tsy fisian-drano, ary naneho fa vahaolana maharitra, rano tonga isan-trano no ilainy fa tsy “bonbone”, izay nolazain’izy ireo fa zara raha “blocs” 2 amin’ny 37 ihany no misitraka izany eny Ankatso 1 sy 2. Nihazo ny oniveristen’Antananarivo, ka nandoro azo sy kodiarana. Tsy hijanona ny hetsika raha tsy misy rano tonga isam-baravarana. Toy ny pipin-jazazakely ny rano kanefa amin’ny 1ora maraina vao mba mandeha. Mila mandeha daholo ny paompy rehetra, ary vahaolana maharitra no takiana, fa tsy “bonbone”, hoy hatrany ireo. Efa ho lava ity grevy momba ny tsy fisian-drano ity, ka irariana ny ahitana vahaolana maharitra.
Toky R