Sosialy

Ambohidahy Nogiazan’ny polisy ny henankisoa iray sarety

Sosialy
Talata 02 Jona 2020

Nogiazana tao amin’ny kaomisarian’ny boriboritany voalohany na CSP1, etsy Analakely,

ny hena kisoa iray sarety ny sabotsy teo. Ankoatry ny fampandriana fahalemana, hentitra ny polisim-pirenena ny amin’ny fahadiovana sy ny fitandroana ny fahasalamam-bahoaka. Vao maraim-be, sarety iray nitondra hena matavy tsy misarona, avy eny Anosibe hamidy eny Analakely no nenjehana ka nentina tany amin’ny birao. Ny lehiben’ny kaomisaria CSP1, ny kaomisera Steven Randriamparany, izay nanao fanamiana sivily mihitsy no nahatsikaritra ity fitaterana manao tsinontsinona ny fahadiovana ity, nandalo iny tonelina Ambohidahy iny, raha ny fanazavana voaray. Tsy azo ekena, hoy izy, ny tahaka izao, indrindra amin’izao valan’aretina Coronavirus efa mihanaka izay tsy izy, sady mamono olona izao. Homena fampitandremana sy lesona mafy ny tompon’ny sarety sy ny entana ka halefa avy eo, raha ny fanampim-panazavana voaray, satria dia voalaza ho mbola naniratsira mpitandro filaminana koa ilay tompon’entana.

J. Mirija