Sosialy

Ambohibao Antehiroka Laharam-pahamehana ny fanadiovana ny tanàna

Sosialy
Alatsinainy 17 Febroary 2020

Maika ny asa fampandrosoana ho an’ny kaominina Ambohibao Antehiroka, distrikan’Ambohidratrimo.

Lohalaharana amin’izany ny asa fanadiovan-tanàna, ny fandrindrana ny fifamoivoizana, ny fandraisana olona eo anivon’ny kaominina mba ho toerana hahatamana ny rehetra. Nivoitra io ny sabotsy teo nandritra ny fametrahana tamim-pomba ofisialy ny ben’ny tanàna Rivolalaina Vonjy Arthur tamin’ny toerany, narahin’ny fampisalorana azy ny samboady. Teny amin’ny kianjan’ny Mazda eny Ambohibao Antehiroka no nanatanterahana ny lanonana, notronin’ireo solombavambahoaka mirahalahy voafidy teny Ambohidratrimo sy ireo ben’ny tanàna avy amin’ny kaominina 24 mandrafitra ity distrika ity. Hampiavaka an-dRivolalaina Vonjy Arthur raha araka ny fanazavany ny fisokafany amin’ny rehetra amin’ny fiaraha-miasa ho enti-mampandroso ny tanàna. Aoka izay, hoy izy ny hampom-po politika izay tsy nahafahana nampandroso ny firenena hatramin’izay fa aleo mifanome tanana amin’ny fampandrosoana iraisana mba hisy akony amin’ny isam-baravarana. Fiaraha-miasa notanterahina tao amin’ny la residence Vatosoa moa no namaranana ny lanonana raha natomboka tamin’ny vavaka izany.

Pati