Sosialy

Akanjo mafana Manomboka hifandrombahana eny an-tsena…

Sosialy
Zoma 25 Mey 2018

Raha somary mbola nangingina teo aloha teo ny tsenan’ireo mpivarotra akanjo mafana eto amintsika dia efa mandeha tsara ankehitriny.

Hatramin’ny faran’ny herinandro teo izay nampahazo vahana ny hatsiaka teto an-drenivohitra mantsy dia nifandrombahana ny akanjo mafana teny an-tsena izay marihina fa somary niakatra ihany koa ny vidiny. Ho an’ny akanjobà manokana, raha mbola nahazo ny 5.000 Ar teo aloha dia efa niakatra ho 10.000 Ar ny tombany amin’izao ho an’ireo karazany efa nanaovana na ny friperie. Niakatra ho 5.000 Ar ihany koa ny an’ny ankizy raha mbola nahazo iray ny 2.000 Ar teo aloha teo. Ho an’ny menteau kosa indray izay anisan’ny tena be mpividy tokoa dia efa tafakatra 40.000 Ar no hanombanan’ny mpivarotra ny iray amin’izy ireny ho an’ny friperie ihany raha mbola 30.000 Ar teo aloha. Raha ny fanazavan’ireo mpivarotra sendra anay tetsy Mahamasina omaly moa dia ny any am-potony mihitsy no nampiakatra ny vidin’ny akanjo mafana. Efa misy mahatratra hatrany amin’ny 400.000 Ar ny menteau iray fonosana miisa 50 eo ho eo raha 300.000 Ar teo aloha. Ny vanim-potoanan’ny ririnina tahaka izao no tena mampandeha ny varotra akanjo mafana friperie eto amintsika, satria miaka-bokatra avokoa ireo tantsaha. Ho an’ireo akanjo mafana anaty anaty botika kosa indray dia mbola mijanona ho 100.000 Ar hatrany ny vidin’ny akanjobà vaovao iray ho an-dehilahy.

Pati