Sosialy

Akanjo fripy 500 Ariary dia efa mitafy

Sosialy
Zoma 24 Aprily 2020

Maraina ihany no tena tsena hoy ireo mpivarotra ! Tsy maintsy hatao izay hahalafosana mba tsy handry fotsy hoy Tiana, mpivarotra friperie.

Aleo mihinan-kely hoy izy ary tsy maintsy manao solde fa raha tsy izany tsy tafavoaka. Raha ny eo amin’ity mpivarotra ity dia 500 Ariary monja dia efa mahazo akanjo fitafy. Maro ny mpifaninana aminy ary tsy vitsy mihitsy aza ny eo Ambodin’Isotry no mivarotra fitafy amin’ny vidiny tahaka izany saingy samy manana ny anjara masoandrony io hoy i Tiana. Na izany aza dia tena velon-taraina ny tenany ny amin’ity tsena tapak’andro ity ary milaza fa tena tsy misy ny tsena. Tsy miraika mividy fitafiana izany intsony ny ankamaroan’ny Malagasy fa any amin’ny hanina hatrany aloha no mahamay araka ny nambarany. Rehefa misy kely entina mody misakafo dia isaorana ny ao ambony hoy izy. Nangataka ny mba hijeren’ny fanjakana ireo mpivarotra mitrongy vao homana tahaka azy i Tiana satria efa manomboka voakitika hatramin’ny renivola ary maro aza ny lamba efa namidy masonkarena sy namonoana antoka.

Tsirinasolo