Sosialy

Akanin’ny marenina - 67 ha Afaka handray ireo kilonga madinika 2 taona amin’izay

Sosialy
Alatsinainy 25 Febroary 2019

Ho afaka handray ireo kilonga madinika 2 taona manana olana ara-pihainoana manomboka amin’ny volana martsa ho avy izao ny Akanin’ny Marenina etsy 67 ha.

Zarina sahady hianatra ireo ankizy madinika ireo raha ny fanazavan’Andriamampianina Rivo, talen’ny sekoly ao anatin’ilay antsoina hoe : “éducation précoce”. Ny tanjona raha araka ny fanazavany hatrany dia ho afaka hianatra avy hatrany ireo ankizy madinika ireo rehefa feno dimy taona, salan-taonan’ireo ankizy mpianatry ny AKAMA madinika indrindra ankehitriny fa tsy voatery hianatra ny tenin’ny tanana intsony sady ho fanampiana ny ray aman-dreniny ihany koa. Raha oharina amin’ireo ankizy mpianatra mitovy taona aminy mantsy ireo ankizy mpianatry ny AKAMA vao mandia ny varavaran-tsekoly dia somary tara ihany noho ny fianarana sy fandalinana manokana ny tenin’ny tanàna mba hahafahany mifandray. Nomarihin’ity talen-tsekoly ity moa fa tsy ho an’ny mpianatra ihany fa misokatra ho an’ny rehetra ihany koa ny fianarana ny tenin’ny tanana ao amin’izy ireo. Ao anatin’ny 21 andro dia voafehy tanteraka izany. Mianatra ora iray isan’andro ny olona iray. 40.000 Ar ny sarany ho an’ireo olon-tsotra.

Pati