Sosialy

Ady amin’ny tsy fanjarian-tsakafo Olona 264 000 mahazo tan-tsoroka

Sosialy
Alarobia 20 Martsa 2019

Nisokatra tamin’ny fomba ofisialy omaly teny amin’ny Lapan’ny Tanàna Analakely ny fampiratiana hoenti-mampahafantatra ny tetikasa « Asotry », miompana ady amin’ny tsy fanjarian-tsakafo tohanan’ny fanjakana Amerikanina.

Nisolo tena ny Ben’ny Tanànan’Antananarivo, izay nampiantrano ny hetsika Atoa Olivier Randrianarisoa, lefitry voalohan’ny ben’ny tanàna. “Fiainan’olona maherin’ny 264 000 avy amin’ireo faritra ambanivohitra saro-diavina eto Madagasikara no novain’ny tetikasa Asotry, izay manao tan-tsoroka ho an’ireo fiaraha-monina ifotony hanampiany ny tenany amin’ny sehatry ny fanjarian-tsakafo, sy fahasalamana ary fampandrosoana maharitra”, hoy ny Ambasadaoro Michael Pelletier nandritra ny fitokanana ny Vitrine Asotry, nandritra ny kabariny tao amin’ny Lapan’ny tanàna. Matsiatra Ambony, Amoron’i Mania, Atsimo Andrefana no misitraka azy io amin’izao fotoana izao, ary hitarina amina faritra hafa. Ny Sekretera Jeneralin’ny Minisiteran’ny Fahasalamam-bahoaka Dr Andrianirinarison dia niarahaba ny fanomezana fahaiza-manao ireo olona mba tsy hiankina amin’ny hafa intsony ary koa ny fampandraisana anjara ireo lehilahy amin’ity tetikasa fanohanana ny fampanjariana ara-tsakafo ity. Misy ny fampiratiana mahakasika ny tetikasa “Asotry”, izay nanomboka omaly, ary mbola mitohy anio ao anatin’ny programa maro samihafa.

Toky R