Sosialy

Ady amin’ny tsy fanjarian-tsakafo Hofidiana ireo tetikasa 5 mendrika mandritra ny Salon RSE

Sosialy
Talata 21 Aogositra 2018

Hotanterahina ny 31 aogositra ka hatramin’ny 01 septambra ho avy izao etsy amin’ny Hotel Carlton Anosy ilay salon RSE et initiative pour le developpement durable karakarain’ny kabine Ur CSR Consulting.

Andiany fahatelo izy io handraisana orinasa maro anjara, indrindra fa ireo efa misehatra amin’ny fiahiana ny sosialin’ny mponina. Hampiavaka ity hetsika ity, raha araka ny fanazavan-dRtoa Rabefitiavana Ulrichia, tompon’andraikitra voalohany eo anivon’ny kabine Ur CSR ny fisiana fifantenana tetikasa mendrika hoenti-miady amin’ny tsy fanjarian-tsakafo mahazo ny ankizy. Mbola mahatratra hatrany amin’ny 47 % mantsy ireo zaza Malagasy latsaky ny dimy taona no mitondra faisana vokatr’izany manerana ny Nosy, antony nisafidianan’ny mpikarakara ity tetikasa iray ity. Tetikasa miisa dimy ihany anefa no azo horaisina ka hisy mihitsy ny fandefasana horonantsary mivantana hojeren’ny rehetra arahin’ny fametrahana fanontaniana. Afaka mijery avy hatrany koa ireo orinasa vonona hanohana ilay tetikasa na malala-tanana hafa. Tsiahivina fa miara-miasa akaiky amin’ny UNICEF ity kabine iray ity entina hanatsarana ny fiainan’ny ankizy amin’ny ankapobeny raha toraka izany ihany koa ny ady amin’ny hanohanana izay hiarahany amin’ny PAM. Mikasika ny fandraisan’ny orinasa anjara amin’ny fanatsarana ny sosialin’ny mponina moa dia nomarihin’ny mpikarakara fa mbola tena maivana raha oharina amin’ny any ivelany saingy efa manomboka mihatsara.