Sosialy

Ady amin’ny tsy fananan’asa Tanora miisa 16 no nomena fiofanana tao Ankadikely Ilafy

Sosialy
Talata 23 Mey 2023

Be loatra ireo tanora tsy an’asa eto amintsika. Ankoatra ireo nahavita fianarana nefa tsy mahita fianarana mifandraika

amin’izany dia marobe ihany koa ireo tsy mba afaka nanohy fianarana hatramin’ny farany vokatry ny fahasahiranan’ny Ray aman-dReny. Lasa manaotao foana sy variana amin’ny zavatra tsy dia misy antony loatra ny tanora noho izany raha tsy lazaina intsony ireo mirona mankany amin’ny asa fisolokiana, fangalarana, filokana, fisotroana…. Mba hahafahana miady amin’izany dia miezaka manofana ireo tanora ao aminy ny kaominina Ankadikely Ilafy, distrikan’Avaradrano. Tanora miisa 16 nahavita fiofanana tao amin’izy ireo izay misalotra ny anarana "FIVOARANA" omaly no navoaka tamim-pomba ofisialy. Vokatry fiara-miasa teo amin'ny CFP Belanitra sy ny orinasa iray eny an-toerana ary ny Kaominina Ankadikely-Ilafy no nahafahana nanantanteraka izany. Tanjona ny hanohanana ireo tanora ao an-toerana amin'ny fampananan'asa izay anisan’ireo fanamby napetraky ny Ben'ny Tanàna Rija Rajaonah. Izy moa no Ray mpiahy ity andiany vao navoaka omaly ity.
Pati
Legende : Nandritra ny fanolorana mari-pankasitrahana ho an’ireo mpiofana