Sosialy

7 volana tsy nandray karama Raikitra ny fitokonan’ny mpiasan’ny FOFIFA

Sosialy
Alarobia 25 Septambra 2019

Mpiasa hatrany amin’ny 200 eo anivon’ny FOFIFA na ny FOibem-pikarohana momba ny FIkarohana ampiharina amin’ny FAmbolena no nanao fitokonana teny amin’ny anoloan’ny Birao misy io sampan-draharaha io eny Ampandrianomby omaly talata 24 septambra.

Feno ny kapoaka satria efa ela niandrasana sy ela niaretana izahay, hoy ireo mpiasa. Nambaran-dRandrianarivony Hery Lalao mpitondra tenin’ireo mpiasa fa efa 7 volana izay izy ireo no tsy nandray karama. Maro anefa no nindram-bola tamin’ny banky nentina niatrehana ny fiainana andavanandro, toy ny fandoavana hofan-trano, vidin-jiro, sakafo, saram-pianaran’ny mpianatra,… satria nanantena fa mbola ho azo soa aman-tsara ny karama. “Efa bokan’ny trosa izahay ankehitriny kanefa tsy mbola azo ihany ny karama. Ny sasany efa mahazo fandrahonana avy amin’ny tompon-trano. Efa nisy ny fifampiresahana tamin’ireo lehibe ao amin’ny FOFIFA sy ny minisitera Mpiahy saingy tsy nahitam-bokatra, raha ny fanazavana. Ny lehibenay aza tsy hitany intsony izay hatao, hoy ny mpiasa. Izany indrindra no anton’izao fitokonana izao mba ho fantatry ny tompon’andraikitra isan-tsokajiny, indrindra ny filoham-pirenena ny zava-misy mba handraisany fepetra sy tsy hiverenan’ny zavatra tahaka izao intsony”, hoy ny solontenan’ny Mpiasa. Nanamafy ireo mpiasan’ny FOFIFA ireo fa tsy hanohy ny asany izy ireo raha tsy azo ilay karama fito volana takiany.

Toky R sy Tsirinasolo