Transparency international

Hanohy ny tolona ho an’ny demokrasia

Politique
Talata 16 Septambra 2025

Nomarihana omaly 15 septambra 2025 ny andro iraisampirenena

ho an’ny demokrasia. Nisy, noho izany, ny hetsika am-pilaminana nataon’ny Transparency International – Initiative Madagascar n a TI-MG teto Antananarivo sy nanenika ireo tambazotran-tserasera. Nisalotra ankanjo mainty izy ireo ho fanamarihana fa misaona ny demokrasia eto Madagasikara, raha ny fanazavàna voaray. Notsiahivin’ny TI-MG fa mampanahy ny faharefoan’izay demokrasia izay eto amin’ity firenena ity. Mihena sy sehatra ahafahana miteny. Voarara ny fanaovana hetsika na dia am-pilaminana aza. Matetika ny antsojay sy fisamborana tsy ara-drariny. Manjaka ny kolikoly sy ny fanitsakitsahana ny zo maha olona. Atao safobe mantsina ka lazaina ho fanehoan-kevitrana mpikaraman’ady politika ny feon’ny olompirenena tsy mahafaly ny andrim-panjakàna misy. Manoloana izany loza mitatao rehetra izany dia mampahatsiahy ny maha hery arofanina azy ny fiarahamonim-pirenena; mitondra ny feon’ny malagasy, manara-maso ny fiainam-pirenena ary miady ho an’ny zo fototra amin’ny fahalalahana maneho hevitra. Takiana ny famelàna malalaka ireo sehatra hanehoana hevitra! Takiana ny lalàna miaro ireo mpampaneno lakolosy sy mpiaro ny zon’olombelona! Ho an’ny tena demokrasia marina, ny fisian’izany rehetra izany dia tsy tokony ho lafo vidy fa mandeha ho azy. Tsy tokony ho faty mangina ny demokrasia. Mitohy ny tolona! Vao fanombohany izao, hoy hatrany ny TI-MG naneho ny fahavononany hanohy ny tolona ho an’ny demokrasia tamin’iny omaly iny.
J. Mirija