Politique

Tiako i Madagasikara Mitaky fifidianana demokratika tsy misy teritery

Politique
Alatsinainy 28 Desambra 2015

Nikatona tanteraka tamin�ny enina ora maraina teo ny fampielezan-kevitra amin�ny fifidianana Loholona izay hatao rahampitso talata 29 desambra 2015.

Samy nanao izay ho afany ireo antoko sy fikambanana nandrotsaka kandida amin’ity fifidianana ireo izay handrafitra ny rafitra faharoa amin’ny andrim-panjakana mpanao lalàna ity. “Afa-po” tamin’ny fandresen-dahatra ireo mpifidy vaventy nataony, nitetezany Distrika nandritra izay 21 andro izay ny Tiako I Madagasikara ary milaza fa “be fanantenana” ny amin’izay ho vokatry ny latsa-bato hataon’ireo mpifidy vaventy miisa 12.664 rahampitso, amin’ireo biraom-pifidianana miisa 1.695 manerana ny Nosy.

“Manana ny toerana maha izy azy ny mpifidy vaventy ary olona voafidim-bahoaka ka mendrika ny fifidianana demokratika tsy misy teritery ary tsy tokony hampitahorina satria matoa nanao Ben’ny tanàna na mpanolotsaina dia efa manana finiavana handray anjara amin’ny fanasoavam-bahoaka ka avelao hifidy malalaka izay Loholona tiany sy maharesy lahatra azy”, hoy Raharinavalona Mamy Mamonjy, amin’ny lisitra Tiako I Madagasikara ho an’ny faritanin’Antananarivo, eny amin’ny tambajotran-tserasera facebook.

Jean D.