Tetezamita iraisana Ho mpandray anjara ny AMF

Partagé sur :
• facebook

Tsy ho mpitazana fotsiny fa dia ho mpandray anjara feno amin’izao tetezamita iaraha-mitantana an-dalam-pananganana izao ny AMF/3FM tarihin’ny Rév Satrobory.

 Mahatsiaro manana andraikitra izahay hanavotana ny maro an’isa madinika ka niatrehany ny tolona izay nampitondra faisana anay mpitarika, araka ny fanambarana nataony omaly. Notsiahiviny tamin’izany ny endrika fandraisana andraikitra nataony, toy ny nanolorany tena ho mpampihavana an’ny filoham-pirenena Marc Ravalomanana sy ny filohan’ny Fahefana avon’ny tetezamita, Andry Nirina Rajoelina, amin’ny maha raiamandreny am-panahy azy, hilaminan’ny firenena, hiverenan’ny asa sy fandriampahalemana tsy hisian’ny ady an-trano. Amin’izao vanim-potoana hananganana governemanta, tafiditra amin’ny fampiharana ny tondrozotra izao dia nambaran’ny Rév Satrobory fa nanolotra anarana telo teny amin’ny Lapan’ny praiminisitra Mahazoarivo hatao minisitra amin’ny governemantan’ny firaisam-pirenena ny AMF/3FM. Nambarany fa ny sosialy no rafitra irotsahan’izy ireo dia ministeran’ny fahasalamana, ny fampianarana fototra ary ny fanatanjahantena. Tsy hijanona eo fa dia hitohy hatrany amin’ny fanolorana olona ho mpikambana amin’ny CST, CT, CENI indrindra ny Komitin’ny fampihavanam-pirenena izany. Manana olona mendrika sy vonona amin’ireo rafitra ireo ny AMF/3FM, hoy Rév. Andrianalijohn Ndriamanampy. Na izany aza, hoy ity farany, dia modely tsara no nataon’ny filoha Zafy Albert ka tsy voatery ho AMF/3FM no hatolotray fa izay mendrika sy manana traikefa.
Nangonin’i Jean D.

Tia Tanindrazana

Samia mijoro ho an'i Gasikara.