RANDRIANARIVONY JOCELYN

"Tsy tompon'andraikitra no misy eto fa tompon-toerana"

Politique
Alarobia 06 Aogositra 2025

Naneho ny heviny mikasika ny zava-misy lalovan'ny Firenena ankehitriny Randrianarivony Jocelyn,

lefitra voalohan'ny Ben'ny tananan'Ampitatafika, distrikan'Atsimondrano. Nambarany tamin'izany fa tompon-toerana no misy eto amintsika fa tsy tompon'andraikitra. Ny 80% -n'ny vahoaka Malagasy no nambarany fa efa mahatsapa tanteraka ny tsy fandehanan'izao Fitondrana izao amin'ny laoniny intsony. Marobe ireo karazana harena an-kibon'ny tany sy voly fanondrana mampiavaka an'i Madagasikara hoy izy saingy tsy misy mipaka any amin'ny vahoaka Malagasy akory ny tombontsoa azo avy amin'izany. Tompon-toerana no misy eto fa tsy tompon'andraikitra. Noraisiny ohatra ihany koa ny mikasika ilay tompon-toerana iray efa nanao fahadisoana ary efa voaroiroy tany ivelany saingy mbola naverina eto an-tanindrazana indray ary lasa mpanolon-tsaina manokana mihitsy. Rehefa inona vao misy sazy mahazo ny karazan'olona tahaka ireny ? hoy Randrianarivony Jocelyn. Raha tena tompon'andraikitra no misy eto hoy izy dia tsy hijery maso fotsiny ny fahasahiranana mahazo ny vahoaka fa mandray ny andraikiny avy hatrany.
Pati
Légende : Randrianarivony Jocelyn, lefitra voalohan'ny Ben'ny tananan'Ampitatafika !