Raharaha Ratsimandrava

Nangataka fanokafana fanadihadiana ry Rossy

Politique
Talata 20 Febroary 2024

Herinandro mahery kely taorian’ny fahatsiarovana ny faha-49

taona namonoana ny kolonely Richard Ratsimandrava ny 11 febroary teo, tonga nanatitra taratasy mikasika ny fangatahana fanokafana fanadihadiana momba ny namonoana an’io filoham-pirenena maty am-perin’asa io teny amin'ny Ministeran'ny fitsarana ny fikambanana miaraka amin'ny depiote Paul Bert Rahasimanana na Rossy. Notanterahina izany hoy ity farany, taorian'ny fanambaràna nataon'ny filoha Didier Ratsiraka, hafatra napetrany talohan'ny hahafatesany, ka nitondra porofo sy "faits nouveaux" nanononany anarana vavolombelona mbola velona ary tsy mbola nanontaniana. « Vitako ny adidiko araka ny fangatahanareo mpikambana. Adidin'ny fitsarana sisa. Mbola eto isika hanohy ny tolona natomboky ny zokibe Ratsimandrava ho an'ny fokonolona, ny fanapariaham-pahefana ary ny fiarovana ny harem-pirenena », hoy ny depiote Rossy. Tsara ihany koa ny manamarika, fa hisy ny famelabelaran-kevitra sy fijoroana vavolombelona mikasika ny raharaha Ratsimandrava rahampitso 21 febroary tolakandro manomboka amin’ny 2ora, ka ny tapany voalohany dia ny Jeneraly Ramakavelo Désiré sy Ratsimandrava Danielle zanaky ny kolonely Ratsimandrava no hiresaka, ary ny tapany faharoa kosa dia ny mpahay tantara Rakotonaivo Danielle.
Toky R