Politique

Raharaha « Iles Eparses » Mangina tanteraka ilay Vaomiera Malagasy-Frantsay

Politique
Alakamisy 19 Aprily 2018

Tsy heno intsony ny tohin’ny asan’ilay voamiera iombonan’ny Malagasy sy ny Frantsay momba ny « Iles Eparses » na ireo nosikely Malagasy mbola hifandroritana amin’i Lafrantsa.

Nangina tanteraka ary tsy misy intsony ny tatitra sy fampitam-baovao mahakasika ny raharaha. Raha tsiahivina dia efa tamin’ny andron’ny Minisitry ny Raharaham-bahiny, Attalah Béatrice, izany resaka fananganana vaomiera iombonana izany eo amin’ny Ministeran’ny raharaham-bahiny roa tonta mba handinihina ireo nosy miisa efatra manodidina an’ I Madagasikara. Nandeha mihitsy ny dokadoka tamin’izany fa noho ny fahaizan’ny Filoha ankehitriny dia tafapetraka tamin’ny fotoana fohy ireo voamiera handinika izany. Tahaka ny fampantenana poakaty rehetra fanaon’ny fitondrana anefa dia tsy re tsaika intsony ny asa ataon’ireo vaomiera ireo momban’ny fitakiana ireo nosy ireo. Nambara anefa fa mila averina amin’ny vahoaka Malagasy ary tokony afaka manjono malalaka any ny sambontsika. Tsy mahagaga fa efa fomba fanaon’ity fanjakana ity hatramin`izay ny fampiesonana ny Malagasy tahaky ny hoe hanafoana ny delestazy sy ny tsy fandriampahalemana anatin’ny telovolana, ny fitsaram-bahoaka, ny fampidinana ny vidim-bary…

Tsiry