Politique

Partagé sur :
• facebook

Tokony ho fanapahan-kevitra matotra sy am-pahendrena no hamahana ny olana eto amin’ny firenentsika ary izany indrindra no notakian’ireo mpiara-dia amin’ny Amiraly Didier Ratsiraka, raha ny nambaran’ny printsy Elakovelo.

 Ny fampanjakana ny fifandeferana sy ny fanesorana ny hambom-pon’ireo mpiantsehatra politika no tena takiana amin’izany, araka ny filazany. Tsy nandray anjara tamin’ny fanasoniavana ny tondrozotra, araka izany, ny ankolafy Ratsiraka, satria efa tsinjon’izy ireo sahady ny tsy fitazoman’ny mpanohana ny FAT ny teny sy ny tsy fanajany ny zavatra nosoniaviny. Manjary manaiky hanao sonia ny tetika ambadik’izy ireo izahay, hoy hatrany ny Printsy Elakovelo. Anisan’ny takiany ny tokony hanaovana fivoriana an-tampony amin’ireo mpanao politika mpifanandrina rehetra, izay atrehan’ny mpanao gazety isanisany eto amin’ny firenena. Eto dia notsipihany fa tsy avakavahana ny mpanao gazety manatrika izany, ary hajaina ny fahalalahany hamoaka izay rehetra niseho nandritra ny fivoriana. Tsy zavatra mirefarefa amin’ny tany no atao fa ifanarahana sy ifanekena tsara. Ialana ihany koa ny filazana lainga afafy ny vahoaka amin’izay fotoana izay, satria tokony hapetraka hatrany fa ny vahoaka no masi-mandidy amin’ny firenena. Nofaritany fa mitady ny tombontsoany manokana ireo tia sy zatra mamafy lainga ny vahoaka na nandritra ny fifanarahana natao teto, indrindra fa ny tany ivelany.
Manohy

Tia Tanindrazana

Samia mijoro ho an'i Gasikara.