Pr Limby sy ireo kandidà naodina ny vatony

Partagé sur :
• facebook

Hangotraka ny tolom-pitakiana amin’ity herinandro ity ary ahiana ny hivadihan’izany ho zavatra hafa tanteraka, raha ny zava-misy amin’izao no zohina, raha tsy misy ny fandraisan’andraikitry ny CENI-T sy ny CES.

Ao Toliara sy any amin’ny faritra Atsimo Andrefana, dia vonona hiaro hatramin’ny farany ny safidim-bahoaka ry Pr Mandridake Elimberaza (Limby) sy ireo vondron’ny kandidà naodina ny vatony mba hampandresena ny kandidàm-panjakana. Anio maraina dia hanao valan-dresaka fahatelo amin’ny mpanao gazety ao amin’ny Anterimieran’ny varotra Toliara izy ireo izay tsy manaiky lembenana mihitsy manoloana ny hala-bato nitranga na tamin’ny fifidianana filoham-pirenena io, na tamin’ny solombavam-bahoaka. «Antsika i Toliara ary an’ny Malagasy tofoka krizy sy fahantrana i Madagasikara, ka aza matahotra ny ramatahoran’ny FAT», hoy Pr Elimbiraza, hentitra sady nahitsy fiteny, toa nanome toky sahady ny vahoaka. Nitodika tany amin’ny tompon’andraiki-panjakana nahazo fandrahonana ny tenany «hajao ny asa nanendrena anareo ho tombontsoam-bahoaka, fa aza matahotra ramatahora izany ary sahy mijoro ho tombontsoam-bahoaka», hoy hatrany i Limby.

Ny ao Toliara dia manana porofo ry Limby raha ny filazany nandritra ny valan-dresaka tamin’ny mpanao gazety nataon-dry zareo ny sabotsy 21 desambra teo, satria ny tompon’andraikitry ny  CED Toliara no nilaza fa nisy ny hala-bato ary efa fantatra ny anaran’ny nikotrika izany. «Mitaky ny mangarahara izahay. Mba hahamarim-pototra ny fitakiana dia efa naka vadintany sy nitety Fokontany nanaporofo ny fisian’ny hala-bato», hoy i Pr Napetoke, «mandataire»-n’ny kandidà Robinson Jean Louis. 

Tsy ny distrikan’i Toliara I-II ihany no nahitana hosoka sy hala-bato avo lenta, fa ny faritra Atsimo Andrefana iray manontolo sy ny tapan’ny atsimon’ny Nosy iny, raha ny tati-baovao voaray, toy ny tany Morombe, Tolagnaro, sns. Nosandaina vola ireo mpifidy nandritra ny androm-pifidianana mba handatsa-bato ho an’ireo kandidam-panjakana. Nomena vola ihany koa ireo tompon’andraikitry ny biraom-pifidianana, mba hameno ireo biletà tokana tsy feno mba hampandresena ny kandidàm-panjakana.

Raha ny tatitra voaray hatrany dia nametraka fitoriana eny anivon’ny CES ireo vondrona kandidà ireo miaraka amin’ny porofo rehetra mikasika ny fanomezana vola, fanaovana fampielezan-kevitra ny andron’ny fifidianana ary ny fividianana olona handatsa-bato ho an’ny kandidàm-panjakana. Fanontaniana no apetraky ny mpanara-baovao : “efa manao ny asany ve ny CENI-T mba hahafantarana ny tena zava-misy marina amin’ireo toerana samihafa nahazoana fitarainana ?». Raha vantanina ny resaka dia mandrahona hidina an-dalambe ireo tsy faly ka hiteraka krizy vaovao indray raha tsy mahazo valiny mahafapo amin’ny fitakiany ! Mangataka ireo vondron’ny kandidà ny hamerenana ny fifidianana maloto farany teo iny mba hisian’ny tena fitoniana sy hivoantsika marina amin’ny krizy.

E.R

Tia Tanindrazana

Samia mijoro ho an'i Gasikara.