Politique

Partagé sur :
• facebook

Voninahitra ho ahy ny mampilaza aminareo fa nekeko am-panetren-tena lehibe ny safidin’ny mpiara-mitolona rehetra ao amin’ny antoko politika “Ny fireneko”

hitantanako io antoko io, hoy ny minisitry ny fanabeazam-pirenena teo aloha sady mpahaifiarahamonina, Paul Rabary. Miandry vinam-piarahamonina vaovao sy teti-panorona maty paika i Madagasikara amin'izao akatoky ny faha 63 taona niverenan'ny fahaleovantena izao, hoy izy. Politikam-pampandrosoana amin'ny lafiny toekarena, sosialy, fambolena, fizahantany, fahasalamana, fampianarana, ho an’ny tanora, mpanao asan-tanana, vehivavy, mpiasam-panjakana, mpandraharaha, mpiasa tena, mpiasa amin’ny orinasa sy sehatra tsy miankina no hahafahana manome hasina sy lanja ny ady hevitra politika eto Madagasikara. Iarahana mijery ny fototr’olana ary iarahana volavolaina ny vahaolona. Koa manao antso avo amin’ireo mpiray tanindrazana tsy an-kanavaka hifandrimbona sy hifanoro hevitra ary hiaradia satria ny taotrano tsy efan'irery ary ny raharaha politika tsy azo avela ho an’ny mpanao politika irery ihany. Isika rehetra dia afaka mitondra ny anjara biriky amin'ny fanarenana ny firenena ary samy tomponandraikitra amin'ny hoavin'ny taranaka faramandimby. Misokatra ny varavaran'ny antoko politika Ny fireneko amin'ny fijery rehetra, amin'ny olona rehetra, amin'ny sehatr’asa rehetra satria mendrika ny tsaratsara kokoa i Madagasikara, hoy hatrany ny tenany.
J. Mirija
 

Tia Tanindrazana

Samia mijoro ho an'i Gasikara.