Nopatahin’ny kandidam-panjakana ny lalana

Fitohanana tsy nifankahitana tetsy Anosibe

Politique
Talata 28 Mey 2024

Nampiteny ny moana ny fitohanana niala teny Anosy niazo an’Anosibe omaly Alatsinainy 27 May hariva nanomboka tamin’ny 05 ora.

Tapaka tanteraka mantsy ny lalana nivoaka an’Anosizato. Nahatratra ora iray ny fiara sy ny moto vao tafavoaka teo amin’ny sampanana niazo an’i Namontana notronin’ireo taxi-bisikileta marobe. Antony nahatonga izany ny fanapahan’ny kandidam-panjakana iray ny lalana. Novonoina mihitsy ny arabe iray nanangana trano nanaovana lanonana famaranana ny propagandy sy nampifalifaliana vahoaka. Ny tena nahavariana ny maro dia nambenana mpitandro ny filaminana mihitsy izany. Nahatsiaro nijaly fatratra ireo mpampiasa lalana. Fiara sy moto ary bisikileta an-jatony mantsy no mifamezivezy amin’iny lalana iny rehefa fotoana firavan’ny mpiasa sy ny mpianatra tahaka ireny. Tsy milamina ny fitohanana isan’andro raha tsy amin’ny 07 ora hariva any ho any nefa vao mainka notapahina indray ny lalana. Ry zareo tokony hampianatra hanara-dalana indray araka izany no tsy nanara-dalana. Mety ho tahaka ny ahoana re no nitranga raha kandida tsy miankina na any amin’ny Vovonana firaisankina no nanapa-dalana tahaka ireny teto an-drenivohitra e ?
Pati
Legende : Voabahana tahaka izao ny arabe