Politique

Partagé sur :
• facebook

Nahitsy ny tenin’ny senatera teo aloha, Mosa Tahiry, mpikambana sady manetsiketsika ny antoko Tiako I Madagasikara ao Tolagnaro, raha nanao valandresaka ho an’ny mpanao gazety, tao amin’ny trano fonenany ao Bazaribe Tolagnaro, nanambarany ny heviny mikasika ny toe-draharaham-pirenena ankapobeny eto Madagasikara.

 Raha mbola sakanana ny fiverenan’ny filoha Marc Ravalomanana eto an-tanindrazana, hoy izy, dia tsy hivaha mihitsy ny olana. Mazava ny voalazan’ny tondrozotra ao amin’ny andininy faha-20, hoy i Mosa Tahiry, kanefa dia misy sahy mamadika azy io ho zavatra hafa. Aminy, ny fitondrana FAT no mampikatso ny famahana ny krizy fa tsy ny Ankolafy telo na ny ekipan’ny filoha Marc Ravalomanana. Voasoratra mazava ao amin’ny tondrozotra, hoy izy fa mirodana ny governemanta lazain’ny sasany fa firaisam-pirenena, kanefa mbola sahy miziriziry ireo mpomba ny fitondrana FAT fa io ihany no hatevenina. Maha kely finoana ny hivoahan’ny Malagasy amin’izao krizy mangitsokitsoka izao raha mbola hifanasa vangy ny samy mpanao politika, hoy ity senatera teo aloha ity. Mikasika ny fandraisan’ny filohan’ny FAT fitenenana tany New York, nandritra ny fivoriambe faha-66-n’ny Firenena Mikambana dia milaza i Mosa Tahiry fa tsy midika ho fankatoavana velively fa kosa miendrika fanerena ankolaka na mivantana ny fitondrana sarisariny hanaraka ara-bakiteny ny tondrozotra.

Aminy dia tokony hisy ny fifamelana raha tiana hilamina i Madagasikara. Iza no sahy hilaza fa madio tamin’ity fitondrana tsy ara-dalàna ity ? Nandritra ity fihaonany tamin’ny mpanao gazety ity ihany no nanentanany ny mpikambana Tiako I Madagasikara mba tsy horebireben’ny mpanao politika. Aminy dia tokana ny Tiako I Madagasikara dia izay mpanohana sy mpiara-dia amin’ny filoha Marc Ravalomanana, izay nambarany fa nahavita asa fampandrosoana betsaka tany amin’ny faritra Anôsy. Notsindrian’ity Senatera teo aloha ity hatrany fa miaraka amin’ny filoha Marc Ravalomanana hatramin’ny farany ny tenany.

Natiora OTH

Sary : Senatera Mosa Tahiry

Tia Tanindrazana

Samia mijoro ho an'i Gasikara.