Politique

Mandrak’ity ny anio, tao anatin’izay folo volana nisian’ny FAT izay, tsy mety lafo io voromby io, na dia nanaovana dokambarotra ary niantsoana izao karazana orinasa lazaina fa havanana amin’ny fivarotana fiaramanidina sy helikoptera avy any ivelany rehetra izao aza. Ny mahatsikaiky amin’ity raharaha ity dia miovaova hatrany ny filazan’ny avy eo anivon’ny Minisiteran’ny fitaterana momba azy io, na ny tombam-bidy izany, ny lafiny teknika momba ny fiaramanidina, eny fa ny tompony aza. 60 tapitrisa dolara no nolazaina tany am-boalohany fa nividianana io “Force One II” io, ka hoe ny antsasany naloan’ny Fanjakana ary ny ambiny fandraisana anjaran’ny filoha teo aloha Marc Ravalomanana. Nangata-panazavana mikasika izany ny Tahirim-bola iraisam-pirenena. Niakatra Fitsarana famaizana tamin’ny 03 jona 2009 io raharaha io ka nohelohin’ny Fitsarana efa-taona an-tranomaizina sazy mihatra i Marc Ravalomanana sy Haja Nirina. Razafinjatovo, Minisitry ny fitantanam-bola sy ny tetibola tamin’izany, miampy onitra 70 tapitrisa dolara isanisany avy. Midika io fa notanan’ny Fitsarana ny 60 tapitrisa dolara vidin’ilay fiaramanidina tamin’ny fandinihana ny antontan-taratasin’ady ary misy idiran’i Marc Ravalomanana. Ankehitriny anefa dia hafa no vidy ambaran’ny Minisitry ny fitaterana. Eo amin’ny 38 tapitrisa dolara indray no tombanana ho vidin’io. Manaraka dia miahiahy ary mametra-panontaniana indray ny Minisitera raha misy idiran’i Marc Ravalomanana mivantana marina ny fahazoana an’io “Force One II” io. Mbetika milaza fa mifaningotra amin’ny orinasa Daewoo ny nahazoana azy, mbetika tenenina fa na ny vaovao amin’io karazana fiaramanidina io aza tsy mahatratra 60 tapitrisa dolara ny vidiny. Dia notovonana filazana fa be pitsopitsony amin’ny fikojakojana tsy vita tamin’ilay fiaramanidina. Raha akapoka dia samy manana ny filazany ny Minisitry ny Fitsarana sy ny Fitaterana momba io “Force One II” io. Raha izay no izy dia ipetrahan’ny adihevitra ny didim-pitsarana nivoaka tamin’ny 03 jona 2009. Nihazakazahana mba hanamelohana an’i Marc Ravalomanana ?

 

Jean D.