Masoivohon’i Frantsa nitsidika an’i Morondava

Jerena izay azo hiaraha-miasa ho an’ny fampandrosoana…

Politique
Alarobia 28 Mey 2025

Nanatanteraka fitsidihana ara-pomba ofisialy tao amin’ny tanànan’i Morondava ny

Masoivohon’ny Repoblika Frantsay monina sy miasa eto Madagasikara Arnaud Guillois, tamin’ny faran’ny herinandro lasa teo. Tonga nanotrona azy teny amin’ny seranam-piaramanidina Morondava ireo manam-pahefana avy amin’ny Faritra Menabe, ka ny Talen’ny Kabinetra no nisolo tena ny Governoran’ny Faritra nandritra ny lanonam-pitsenana. Tao anatin’ity fitsidihana ity no nanatanterahana dinika niarahana tamin’ny solontenan’ny fitondrana sy ny tompon’andraikitra isan-tsokajiny mikasika ny fiaraha-miasa eo amin’ny firenena roa tonta, indrindra amin’ny sehatra manampy amin’ny fampandrosoana ny Distrikan’i Morondava. Nisongadina tamin’ny fandaharam-potoanany ihany koa ny fitsidihana ireo fotodrafitrasa manabe toy ny sekoly sy ny tranomboky ao amin’ny Alliance Française Morondava, izay anisan’ny sehatra iaraha-miasa amin’ny fanamafisana ny kolontsaina sy ny fahaiza-miteny amin’ny teny frantsay eto an-toerana.
Asmynah Randriamananjara (Mpiana-draharaha)