Politique

Partagé sur :
• facebook

Nitafa mivantana an-tariby avy any Afrika Atsimo tamin´ny vahoakan´i Toamasina, nandritra ny hetsiky ny Rodoben´i Toamasina Atoa Marc Ravalomanana ny sabotsy teo.

 Nandritra izany no nitondrany ny heviny mikasika ny toe-draharaha politika ankehitriny, ka nilazany fa “nanao sonia ny tondrozotra isika ary mankasitraka izany hialana amin´izao fahasahiranan´ny firenena sy ny vahoaka Malagasy izao. Voalaza mazava ao anatin´ny tondrozotra ny fodian´ireo sesitany politika sy ny famoahana ny gadra politika, nefa mandraka ankehitriny tsy mbola misy ny fijerena izany ary tsy mbola laharam-pahamehan’ny praiminisitra vaovao izany, fa adilahy politika ady seza no mahamaika”. Nohamafisin´Atoa Marc Ravalomanana, fa “vokatry ny tsy fiheverana ny tombontsoan´ny Malagasy sy ny tsy fanajana ny sonia ny tondrozotra natao ireo, dia nanapa-kevitra tsy handray anjara ao anatin´ny governemanta izay hatsangana eo ny ankolafy Ravalomanana, ho fanajana ny sonia natao”. Hentitra anefa Atoa Marc Ravalomanana nilaza mazava fa tsy ny ankolafy tarihiny mihitsy no misakana sy ho sakana amin´ny famahana ny krizy, fa ny fampiharana ny tondrozotra nifanaovana sonia sy ny niarahana nanaiky no takiany.

“Tsy ny toerana no mahamaika antsika, fa ny fiainam-bahoaka hilamina amin´ny fampiharana ny tondrozotra ihany”, hoy izy nanamafy. Ankoatra izay, dia nampirisika ny mpiara-dia aminy Atoa Ravalomanana ny tsy hanaiky lembenana ary hanohy ny fitakiana sy ny hetsika atao rehetra, satria “tsy mbola tratra ny tanjona tiana hapetraka handaminana ny raharaham-pirenena araka ny tondrozotra nifanaovan´ny mpanao politika Malagasy sonia”. “Ambarao sy aelezo amin´ny Malagasy rehetra ny vaovao tena marina fa betsaka ny mpandika vilana sy milaza lainga ary ireo fahavalom-pirenena faly amin´ny fahorian´ny Malagasy”, hoy hatrany izy. Ankilan´izay, anisan’ny manohana ny fihaonana eo amin´ny lehiben´ny ankolafy efatra miaraka amin´ireo lehiben´ny vondrona politika nangatahan´ny amiraly Ratsiraka hatao eto Antananarivo mialoha ny 17 novambra koa Atoa Ravalomanana, na tsy nilaza mivantana izany aza izy nandritra ity tafa nataony ity.

Rakoutou

Sary : Liana fatratra tamin'ny kabarin'ny Filoha Ravalomanana ny rehetra

Tia Tanindrazana

Samia mijoro ho an'i Gasikara.