Politique

Partagé sur :
• facebook

Tao anatin’ny herinandro telo nifanesy izao dia tsy nitsahatra niditra an-tariby mivantana mampahafantatra ny vahoaka any Alaotra, indrindra ny ao amin’ny Distrikan’Ambatondrazaka ny fivoaran’ny toe-draharaha misy eto amin’ny firenena ny filoha Marc Ravalomanana.

 Nandritra ny hetsika nokarakarain’ny Vondron’olon-tsotra (VOT) tany Ambatondrazaka ny alahady tolakandro teo, tao amin’ny tany malalaka Antanifotsy no nanamafisany indray fa tsy maintsy mody an-tanindrazana izy ary mody tsy misy fepetra. Efa mizotra araka izay iheverana azy ankehitriny ny ezaka fikatsahana vahaolana ataon’ny SADC sy ny TROIKA ka miaritra kely sisa ny vahoaka Malagasy. Ny vahoaka rehetra izay antenainy fa mbola miandry sy maniry ny fiverenany.

Manafaingana ny fampodiana ireo sesitany politika ny andraikitra efa raisin’ny SADC ka tsy tokony hiroaroa saina intsony ny vahoaka. Hiarahantsika mahalala, hoy izy, fa efa lava dia lava izay fotoana nisian’ny fahasahiranana ara-politika izay, izay niteraka ny fahasahiranana isan-tokantrano sy isam-baravarana, eny hatramin’ny fianaran’ny ankizy aza. Matoky aho, hoy ny filoha Marc Ravalomanana fa Andriamanitra momba antsika. Fisaorana ny Malagasy rehetra amin’ny fananana faharetana tao anatin’izay roa taona sy tapany izay no namaranany ny teniny. Nomarihany moa fa na dia somary sahirana aza izy tamin’iny herinandro iny noho ny tsy maintsy nandehanany namonjy fivoriana iray tany ivelany tany dia zava-dehibe ho azy ny mitafa mivantana amin’ny vahoaka ao anatin’ny Vondron’olon-tsotra.

Niry A.

Tia Tanindrazana

Samia mijoro ho an'i Gasikara.