Politique

Mangalaza Eug�ne : Nipoitra, rehefa iray volana tsy nandrenesam-peo

Politique
Zoma 22 Janoary 2010

Omaly indray ny Praiminisitry ny marimaritra iraisana, Mangalaza Eug�ne, vao tazana rehefa nilentika tsy re firy nandritra ny fotoana lavalava ihany izay.

Noraisin’i Jean Ping, filohan’ny Vaomieran’ny Firaisambe Afrikanina, mitarika ny Groupe International de Contact, mivory ao amin’ny Carlton hatry ny omaly, ny tenany omaly. Tsy nisy nipika ny dinika tamin’izany, izy rahateo tsy nanao fanambarana taorian’ny diniky ny roa tonta.

Anisan’ireo teratany malagasy miisa 25 nataon’ny Fahefana Avon’ny Tetezamita sesitany tany Maputo sy Afrika Atsimo ny tenany, raha avy nandray anjara tamin’ny dinika an-tampony fahatelo nandaminana ny krizy eto Madagasikara tany Maputo ny 03 ka hatramin’ny 10 desambra 2009. Nesorin’ny Fahefana Avon’ny Tetezamita amin’ny maha Praiminisitra lehiben’ny governemanta azy i Mangalaza Eugène, ary namoahany didim-panjakana 2009-1385 tamin’ny 18 desambra 2009 manala azy amin’ny toerany. Tsy nanaiky mora izany ny ankolafy telo, izay mihevitra fa tsy ara-dalàna io didim-panjakana io, ka nametraka fitoriana eny anivon’ny Filankevi-panjakana izy telolahy filoham-pirenena teo aloha, dia Pr Zafy Albert, Didier Ratsiraka ary Marc Ravalomanana. Mbola tantara mitohy ny amin’io satria dia mbola andrasana ny valin-tenin’ny Fitsarana Avo momba ny Lalàm-panorenana mijery ifotony raha mifanaraka amin’ny lalàm-panorenana io didim-panjakana io. Nangina, eny nisintona kely teo amin’ny sehatra politika mihitsy aza, i Mangalaza Eugène teo anatrehan’izany, ka nipetraka tany Toamasina tany, nandritra izay iray volana izay. Amin’izao fahatongavan’ny iraky ny GIC izao indray ny tenany vao niakatra eto Antananarivo.

Jean D.