Politique

Partagé sur :
• facebook

Manoloana ny resabe manodidina azy sy ny fiainany manokana dia nanapa-kevitra ny hivoaka tamin’ny fahanginany ka nihaona tamin’ny mpanao gazety omaly teny an-tranony teny Ankadifotsy i Mamy Rakotoarivelo, filohan’ny kongresin’ny tetezamita teo aloha.

 Nandritra izany fotoana izany no  nilazany fa  mbola  mpikambana  zato   isan-jato   ao amin’ny antoko Tiako i Madagasikara  ny tenany. « Marina fa nisy mpikambana sasany  ao amin’ny antoko izay nahatsiaro voailikilika sy adino no  nanatona ahy ka  nampirisika ahy  hanangana antoko hafa mba ahafahako milatsaka hofidiana  ho filoham-pirenena amin’ny  2018 saingy nolaviko marindrano. Nambarako tamin’ireo mpikambana  fa ny filoha Ravalomanana  ihany no hotohanana amin’ny  2018 fa  hasiana fanamboarana kosa izay  tsy  mety  teo  amin’ny fiainan’ny antoko  mba tsy hisy hahatsiaro tena voailika », hoy Atoa Mamy  Rakotoarivelo. Ny  alatsinainy teo, araka ny  fanazavana nomeny hatrany, no nihaona tamin’ny filoha Ravalomanana  izy ka  nandamina io  resaka  mitady hahakivy ny  mpikambana sasany io. Tapaka tamin’io fihaonana io, araka ny  fanazavana  azo  hatrany, fa tsy hisy intsony ireo mpila ranondranony amin’ny   filoha Ravalomanana ilay  nantsoina hoe Tiko boys sy yes man.

Hanambady indray

Momba ny MBS  indray  dia  nanambara ity tale jeneraliny  ity  fa afaka roa na  iray volana  sy tapany  dia hiverina handeha ny haino aman-jery MBS. Taorian’ny  nakana ny taratasy  fahazoan-dalan’ny MBS dia  nitondra ny raharaha teny anivon’ny filankevitra ambonin’ny fanjakana  ny MBS  ka  manantena ny mpitantana fa hahazo rariny. Momba ny   fiainany  manokana  indray dia  nanamafy Atoa Rakotoarivelo Mamy fa mikasa ny hanorin-tokantrano  ny tenany amin’ny volana febroary  2016 ka ilay tovovavy  teratany vahiny  efa nasehony  tao amin’ny  tranokalam-pifandraisana  ihany no raozy  voafidiny. Mangataka ity mpanao politika ity  ny mba hanajana  amin’izay ny  fiainany manokana.

Andry Ratovo      

Tia Tanindrazana

Samia mijoro ho an'i Gasikara.