Malagasy miara-miainga

Misokatra amin’ny famondronana hery

Politique
Alakamisy 11 Jolay 2024

Handray anjara amin’ny fifidianana ben’ny tanàna sy mpanolontsain’ny

tanàna ny antoko politika Malagasy miara-miainga na MMM amin’ny maha antoko velona sy mandàla ny fitsinjaram-pahefana azy, hoy ny fampitam-baovao voaray omaly. Mitohy ny fitakiana ny hanatsarana ny tokontanim-pifidianana, raha ny fanazavana, hivoahan’ny safidim-bahoaka. Ankoatra izay, mijanona ho antoko mpanohitra ny MMM ary misokatra amin’ny fifampiresahana raha hisy ny famondronana hery. Araka ny nambaran’ny mpikambana eo anivon’ny birao politikan’ny MMM omaly tamin’ny alalan’ny Me Ramilison Toky dia manohy ary manamafy ny fitakiana ny hanadiovana ny tokontanim-pifidianana ny eo anivon’ny antoko hivoahan’ny tena safidim-bahoaka ka ho afaka hampandroso ny fari-piadidiana izay olona lany eo. Ankoatra izay, vonona amin’ny fifampiresahana ary misokatra amin’ny herivelona rehetra ny Antoko MMM. Mitaky hatrany ny fanarahan-dalànan’ireo nampindramina ny fahefana ny antoko manoloana ny toe-java-misy ankehitriny. Eo ihany koa ny fanajana ny fisaraham-pahefana araka ny voarakitra ao anatin’ny lalàm-panorenana, hoy hatrany ny fanazavana.
J. Mirija