LALATIANA RAVOLOLOMANANA

Partagé sur :
• facebook

Nandritra ny fanomanana ny fifidianana dia efa nisy ny tsy fahatomombanana,

hoy ramatoa Lalatiana Ravololomanana, isany kandida mpanolontsaina tao amin’ny lisitra tsy miankina notarihan’Atoa Ndriana Razanamasy, nandritra ny tafa niarahany tamin’ny mpanao gazety omaly. Miendrika fividianana ny safidin’ny Malagasy amin’ny fomba ankolaka na mivantana ny firotsahana an-tsehatra nataon’ny filoha nizara vary, ny fizarana vola etsy sy eroa teto Antananarivo, famoahana ny volan’ny banky iraisam-pirenena mialohan’ny fifidianana, hoy ny fanazavana izay lasa kajy politika entina mampandany amin’ny fomba tsy manara-dalàna ny kandida mitonontena ho kandidan’ny fitondrana. Nomarihiny fa ny vahoaka malagasy dia tsy vahoaka misy tompony fa olom-pirenena manana ny maha izy azy, afaka mandray an-tanana ny fampandrosoana ny fiaraha-monina misy azy. Tsy olona baikona fa olona mitsangana mandray andraikitra satria resy lahatra fa tompon’ny tanàna fa tsy mpangatak’atiny. Efa nisintona lakilosy ny amin’ny tokony hanemorana izany moa izy ireo, raha ny firesany saingy tsy nahatapa-kevitra ny CENI. Ankoatra izay dia tsy mazava ihany koa raha ny fanazavan’ity mpanolontsainan’Antananarivo teo aloha ity ny nahafahana nanomena “ordonnance” ho an’ny olona nahatratra 35.000 be izao, izay tsy tafiditra tao anaty lisi-pifidianana. Fifaninanana masiny ny fifidianana hoy izy saingy indrisy fa fifidianana tsy tomombana, feno tsy fanarahan-dalàna, feno hosoka no hita nandritra iny fifidianana lasa teo iny. Ny fifanandrinana eo amin’ny IRMAR sy ny TIM no tena tsy mampandroso an’Antananarivo hoy izy ireo. Efa hatrany am-piandohana moa no efa niteny ny tsy fanekeny ny hanaovana sorona an’Antananarivo renivohitra noho ny adilahy politika intsony ireto farany ka tsy hitazam-potsiny ireo zava-misy fa hiroso amin’ny fanaovana “requête” eny amin’ny « tribunal administratif ».
Lalaina RAV
 

Tia Tanindrazana

Samia mijoro ho an'i Gasikara.