Kristianina mandinika raharaham-pirenena

«Ny firenena matoky an’Andriamanitra no tahiany!»

Politique
Alakamisy 11 Septambra 2025

Manantena fihatsaràna isaky ny misy fanovàna ny vahoaka malagasy

hoy ny Kristianina mandinika raharaham-pirenena, Ralaiarimanana. Raha ny mikasika ny resaka fanovàna governemanta, hoy izy, dia tsy dia vahaolana izany. Ny fahatongavan-tsainan’ny tsirairay no andrasana. Raha tena tia tanindrazana isika, tia mampandroso marina an’i Madagasikara, dia mila mankany ny fisainana hoe ahoana marina no hampandrosoana an’ity Madagasikara ity? Ahoana no hifampifehezana eto amin’ity nosy ity? Na hiova im-polo na in-jato aza ny governemanta dia lasa fanangonan-karena fotsiny. Tokony ho ambany lalàna daholo ny olona tsirairay avy. Rehefa tsy mahavita azy ny governemanta iray dia tsy nandray ny andraikiny izy izay. Ny fahatongavan-tsaina voalohany dia ny fahatahorana an’Andriamanitra. Tsy ny tranobe na ny harem-be voahangona heverinao fa ho lovain’ny taranakao no hampiadana anao. Raha tamin’ny fomba tsy ara-dalàna no nahazoanao an’izany ary tsy milamina ny taninao dia ho esorina aminao na hatramin’ny kely anananao, hoy ny tenin’Andriamanitra. Ny fahamarinana sy ny rariny sy ny hitsiny ihany no mampaharitra. Ny fahatokisanao an’Andriamanitra no hitahina anao sy ny ankohonanao, hoy ny voasoratra. Voataha miaraka amin’izany koa ny firenena iasànao. Ny firenena matoky an’Andriamanitra no tahiany, hoy hatrany ny Kristianina mandinika raharaham-pirenena!
J. Mirija