Kolekitifa an’ny Malagasy – Avaradrano

Sahy hiady hisian’ny tany tan-dalàna eto Madagasikara

Politique
Alakamisy 16 Mey 2024

Mitaky tany tan-dalàna sy ny demokrasia ary ny fanjakana tsara tantana ny fampandrosoa na firenena izany,

hoy ny Kolekitifa an’ny Malagasy ao Avaradrano omaly. Vonona ary sahy hiady ho fametrahana an’izany ireo kandida Solombavambahoaka ho an’ny Fanovana tarihin’ny Kandida Hajo Andrianainarivelo araka ny nambaran’izy ireo teny Ambohimanambola sy Ambohimangakely. Hihemotra hatrany i Madagasikara raha mbola ny goragora, ny gaboraraka sy ny kolikoly ary ny fanaparam-pahefana no manjaka hoy ny kandida avy amin’ny Kolekitifa an’ny Malagasy ao amin’ny Distrikan’Avaradrano. Hitondra ny fanovana, hamerina an’i Madagasikara ho ao anatin’ny tan-dalàna no isan’ny antony andraisana anjara amin’ity fifidianana Solombavambahoaka ity hoy izy ireo. Antom-pijoroana sy nahatonga ny kolekitifa an’ny malagasy handray anjara amin’ity fifidianana Solombavambahoaka ity ny hanohy ny tolona efa natomboka tamin’ny taona lasa, ny hisian’ny fanovana eto amin’ny firenena. Fanovana eo amin’ny fanaovana politika, toy ny tsy fanekena intsony ny faneriterana ireo mpiasam-panjakana hanohana sy hampandany kandida iray, fa fanovana ihany koa eny anivon’ny Antenimierampirenena, mba tsy ho solombavambahoaka ho mpananga-tanana fotsiny tahaka ny zava-misy ankehitriny. Nangonin'i RTT