Kolekitifa an’ny Malagasy – Avaradrano

Mila fahasahiana sy fihavanana ny fanovana

Politique
Alakamisy 23 Mey 2024

Mila olona sahy sy vonona hitondra fanovana ho amin’ny tsaratsara kokoa ny firenena,

ary mila olona tena hisolovava ny vahoaka marina, hoy ny Kandida avy amin’ny Kolekitifa an’ny Malagasy ao amin’ny distrikan’Avaradrano, Hajo Andrianainarivelo afak’omaly, teny Ambohimanga Rova. Olona niasa, miasa ary hiasa ho an’Avaradrano ireo kandida avy amin’ny Kolekitifa an’ny Malagasy. Maro ny asa niaraha-nanao, niaraha-nisalahy tamin’ny vahoaka teny ifotony na nanana fahefana na tsia. Hamafisina ny ezaka efa vita ary hoy ny kandida laharana faharoa izay tarihin’i Andrianainarivelo Hajo sy Ratavilahy Andry amin’ny fifidianana Solombavambahoaka. Ankoatry ny fanamafisana ny fihavanana eo amin’ny mponina sy ireo ho Solombavambahoaka, nisy ihany koa ny anjara-biriky natolotry ny kandida ho fanazavana ny tanàna ka nanolorana jiro mandeha amin’ny herin’ny masoandro. Naverimberina hatrany fa tonga ny fotoana irosoana amin'ny fanovana tena izy, atomboka eny amin'ny antenimierampirenena izany.
Nangonin'i RTT