Kandidan’ny TIM ao Andoharanofotsy

Partagé sur :
• facebook

Vanim-potoana mialohan’ny fampielezankevitra isika izao, hoy ny kandidà ho ben’ny tanàna atolotry

ny antoko politika Tiako i Madagasikara na TIM eny Andoharanotsy, Fanja Raharimanana. Azo lazaina ho efa voatety, hoy izy, ny ankabeazan’ny fokontany namantarana ny filàn’ny vahoaka eny ifotony ka nahafahana nandrafitra ny vinam-piarahamonina entina hampandrosoana an’Andoharanofotsy. Ao anatin’izany dia efa tsikaritra sahady ny karazana lalao maloto ataon’ny sasany raha tsy hilaza afa-tsy ny hoe misy ny fanangonana kara-panondro, ny fanangonana kara-pifidianana sy ny fanovàna ireo mpikamban’ny biraom-pifidianana isaky ny fokontany. Miara-miasa amina mpahailalàna izahay ary kandida miisa 3 ankehitriny no miray hina hanohitra ny mety ho endrika hoso-pifidianana rehetra. Mba tsy hanaovanaovam-poana dia niara-niasa amin’ny vaditany mihitsy izahay nanamarina izany. Efa misy ny fandraisana andraikitra nataonay. Ny paikady hisorohana izany hoso-pifidianana izany moa heverina fa mba tsiambaratelonay. Vao naheno feo izahay hoe misy ilay fanangonana kara-panondro na kara-pifidianana sy ny fanovàna sefo fokontany, vao tamin’ny herinandro izao nisy ilay fanovàna mpikamban’ny biraom-pifidianana ary voamarina hoe saika ireo fokontany miisa 8 dia nahitàna izay fanovàna izay avokoa, dia noraisinay ny andraikitray. Raha ny fahalalanay azy dia tokony hisy fampiantsoana fivoriam-pokonolona vao manisy izany fanovàna izany. Laharam-pahamehana eto Andoharanofotsy, raha iverenana kosa ilay resaka vina teo, ny resaka fampianarana sy fahasalamana. Ao ihany koa ny fanatsaràna sy fananganana foto-drafitrasa, ny fanamafisana ny ady amin’ny tsy fandriampahalemana, ny fanadiovana sy fidiovana ary, mazava ho azy, ny resaka fiahiana ara-tsosialy sy ny fandaminana ny resaka fitaterana sy ny tsena, hoy hatrany ity kandida mitondra ny laharana voalohany na n°1 ao an-toerana ity.
J. Mirija
 

Tia Tanindrazana

Samia mijoro ho an'i Gasikara.