Politique

Partagé sur :
• facebook

Manoloana ny zava-nitranga ny 21 Aprily 2018 dia naneho ny heviny ny antoko RAM na ``Rassemblement pour l`Avenir de Madagascar``, izay tarihin` i José Vianey. Nambaran`ity filoha nasionalin`ny RAM fa ao anatin`ny tarigetran`ny antoko ny fampihavanana ny samy Malagasy sy ny fanorenana ny firenentsika.

Noho izany, manameloka ny fandatsahan-drà ny mpiray tanindrazana na inona na inona ny tsy fitovian-kevitra ara-politika misy eto amin`ny Firenena.  Momban`ny raharaham-pirenena dia nanazava izy fa mitaky lalam-pifidianana eken`ny rehetra mba hisorohana ny disadisa mety hitranga ao anatin`ny fiantrehana ny fifidianana. Hisorohana sy hatao izany rehetra izany mba tsy hiverimberina intsony eto amin`ny firenenantsika ny ratra sy ny famoizana ny ain`ny mpiray tanindrazana izay miafara amin`ny loza sy ozona amin`ny firenena. Iray amin’ireo kandida nanolotra ny tenany fa hirotsaka hisedra ny safidim-bahoaka i José Vianey. Miondrika am-panajana amin`ireo izay namoy ny ainy ary mirary fiononanana ho an`ireo fianakaviana izay namoy zanaka sy havana tamin`ny zava-nitranga ny sabotsy lasa teo ary mirary fahasitranana sy fahasalamana ihany koa ho an`ireo izay naratra hoy hatrany ny tenany. Ny 17 martsa lasa teo moa no nilaza tamin`ny fomba ofisialy ny maha kandida filoham-pirenena azy i José Vianey, izay fantatra fa anisan’ny teknisianina tsara fifandraisana amin’ny mpamatsy vola iraisam-pirenena, ary mahalala tsara ny zava-misy ara-toekarena eto.

Marigny A.

Tia Tanindrazana

Samia mijoro ho an'i Gasikara.